Home » Julie » Die gevaar van ‘n romantiese ideaal

Die gevaar van ‘n romantiese ideaal

Wat die mens het, is beter as wat hy begeer (Prediker 6:9).

‘n Gevaar wat gedurig dreig om ons vaster verhoudings, ook die huwelik, te ondergrawe, is wat James Hollis “die romantiese ideaal of mite” noem.

Dit is daardie droom of wens wat meeste mense heimlik koester, dat daar iewers iemand rondloop wat nommerpas vir jou is; iemand wat jou diepste behoeftes sal bevredig, jou felste eensaamheid sal besweer, jou nuwe selfvertroue sal gee en jou blywend sal versorg.

Daardie persoon is die sogenaamde droomvrou of fiere ridder wat jou van al jou ellendes en sorge sal kom red – die flonkerende ster wat altyd by jou sal wees om jou deur die nag te begelei.

Behalwe dat daar nie werklik sulke supermense of -sterre bestaan nie – dié droom is inderdaad ‘n mite – is die versugtinge van die verslaafde romantikus meesal ook super-selfsugtig. Dit hou nie rekening met die ander een se eie unieke persoonlikheid, voorkeur en geskiedenis nie. Dit is geneig om eie verborge drome, eensydige verlangens en onrealistiese verwagtings op die ander een te projekteer.

Meer konkreet gestel: Baie mans, gedryf deur die romantiese droom, soek ‘n vrou soos hulle ma of suster. Terwyl talle vroue in hulle mans ‘n ewebeeld van hulle sterk en effektiewe pa soek. En wanneer die maats nie inpas by hierdie droom of ideaal nie, hulle selfs teen so ‘n idealistiese keurslyf verset, kan dit die voorspel tot baie spanning en probleme in ons verhoudings en huwelike wees.

Die uitdaging is om, terwyl ons nie nalaat om te droom oor intieme en selfs romantiese oomblikke saam nie, dit só aan te pak dat hierdie droom nie die eie unieke kwaliteite waarmee jou lewensmaat jou kan lewe kan verryk, sal ondergrawe nie.

Dít vra dikwels die prysgawe, of ten minste die relativering, van die romantiese ideaal of mite.

Here, bewaar ons vandag daarvan om onrealistiese drome of verwagtings op ander oor te plaas. Hou ons nugter, tevrede met waar ons is en wat ons besit. Amen

Carel Anthonissen