Home » Julie » Die vuur van God se vergifnis

Die vuur van God se vergifnis

Here, U is my lewe, U sorg vir my. Wat ek ontvang, kom alles van U af (Psalm 16:5)

In die huweliksformulier van een van die kerke, is daar ‘n sin wat my deur die jare altyd geraak, bygebly en getroos het.

Dit is die opdrag aan die egpaar om te leef uit dit wat Christus aan hulle geskenk het.

Die opdrag is troosryk, want dit beteken dat ons in die huwelik – ook in ons ander verhoudings – nooit totaal weerloos, alleen en hulpeloos is nie. Want daar is dinge wat Christus aan ons skenk wat ons kan dra en beskerm, waaruit ons met hoop en vertroue kán en móét gaan leef.

Veral wanneer dinge skeefloop en ons sukkel, kan dié geskenke ons help.

Die gawe van Christus is natuurlik allereers sy liefde wat ons moet help om – in die woorde van die formulier – “die selfsug te vermy” en te bou op die mooi dinge wat ons in mekaar vind.

Sy groot gawe is egter sy gawe van vergifnis. Die vermoë en krag om jou eie foute en swakhede, asook dié van die ander een, vrymoedig op die tafel te sit, te erken … en dit dan te vergeet en toe te dek met nuwe aanvaarding, voorneme en liefde. Kortliks: Om die nagmerrie en misverstande, ja, die baklei van gister, agter jou te laat.

En op dié manier telkens weer óór te begin.

Sonder hierdie daaglikse vergifnis, bly ons huwelike en verhoudings kwesbaar, kan dit maklik in onvergenoegdheid, ongeduld en selfs bitterheid verval.

Die wonder is dat hierdie genade om te vergewe, danksy Christus se werk, elke dag beskikbaar en moontlik is.

In die woorde van broer Roger van Tiazé: “The fire of God’s forgiveness flames deep within us, dispelling our many confusions. God calls you by name. That fire burns the very roots of bitterness. That fire never says ‘enough’.”

Here, dit bly U grootste geskenk aan ons – dat U, ondanks ons vele oortredings en foute, ons steeds bly vergewe, elke dag. Help ons om pal daaruit te leef. Amen

Carel Anthonissen