Home » Augustus » Leer die geskiedenis van deernis

Leer die geskiedenis van deernis

Neem my juk op julle en leer van My, want ek is sagmoedig en nederig van hart, en julle sal rus kry vir julle gemoed (Matteus 11:29).

Een van die eerste stappe, volgens die skrywer Karen Armstrong, om deernisvoller in ‘n koue en onsimpatieke wêreld te leef, is eenvoudig om meer oor deernis te leer.

Oor waar dit vandaan kom, hoe dit ontwikkel het, wie oor eeue heen die draers daarvan was en waartoe dit alles gelei het.

In dié opsig herinner Armstrong ons aan iets wat miskien minder bekend vir baie gelowiges is. Dit is dat daar reeds twee eeue vóór Christus mense was wat ter wille van ‘n toleranter en deernisvoller samelewing, opgestaan het téén die kultuur van vergelding, geweld en uitbuiting wat destyds onder meeste volke gangbaar was.

Die filosoof, Karl Jaspers, verwys selfs, aldus Armstrong, na hierdie tydperk as ‘n geestelike rewolusie, een wat deurslaggewend was vir die mens se latere geestelike ontwikkeling.

Die draers van hierdie kultuur van deernis was destyds geestelikes of wyses wat veral in lande soos Indië, China, die Midde-Ooste en Griekeland gewoon het. Gedurig het hulle hulle meer aggressiewe volksgenote aangemoedig en begelei om ook hulle innerlike lewe te ontwikkel. Dit is dié deel van ons lewe waar ons meer kwesbaar, sag en liefdevol is.

Wie dáárop fokus en dit ontgin, so het hulle aangevoer, oorwin nie net hulle diepste vrese en kom tot groter kalmte, geduld en vrede nie – hulle dra ook daartoe by dat die samelewing meer liefdevol, regverdig en heel word.

Volgens Armstrong vind ons hierdie etos van liefde en deernis vandag by alle groot godsdienste.

Ook vir die Christelike geloof bly deernis ’n kernstuk. Jesus verteenwoordig nie alleen ‘n hoogbloei van dié tradisie nie – sy uitlewing daarvan bly uniek.

Tog bly die vraag of ons Hom altyd hierin navolg. Want, soos Richard Rohr, die bekende Franciskaanse priester tereg opmerk, ons mis soms as gelowiges die mees basiese en voor die handliggende waarhede en uitdagings van die evangelie.

En dit is om soos Jesus met deernis, en veral vergifnis, teenoor alle mense te leef.

O Here, wat kan ons ander bid as net dit: Gee ons meer deernis, allereers vir onsself, maar veral ook vir ander. Amen

Carel Anthonissen