Home » September » Seisoene

Seisoene

Elke ding het sy vaste tyd, elke ding in hierdie wêreld het sy tyd (Prediker 3:1).

Wysheid is om die seisoene in jou lewe raak te sien vir wat dit is – ʼn seisoen. Sommige tye is so dol jy nie weet of jy kom of gaan nie; ander tye voel jy miskien jou ure is te leeg. Daar is seisoene van leer, werk, kinders versorg, sukkel en vreugde.

Die kuns is om nie die seisoen waarin jy is mis te kyk en te onderwaardeer nie; om dit nie te vergelyk met tye wat al verby is nie; om nie te verlang na dinge wat nog moet kom nie. Te veel kere kyk ons terug en besef ons het iets gemis, ʼn belangrike oomblik.

Prediker 3 herinner ons dat elke ding ʼn vaste tyd het: “For everything there is a season, and a time for every matter under heaven,” sê die NRSV. Daarom is daar ook “ʼn tyd om aan te skaf, ʼn tyd om te laat wegraak” (3:6).

So is dit ook met ons emosies. Ons gaan deur winter, somer, lente en herfs. Die kuns is om nie jou ervaring op ʼn gegewe oomblik – veral as dit dalk negatief of leeg is – te sien as ʼn teken van God se afwesigheid nie. Ons leef al ons seisoene in sy deernisvolle teenwoordigheid.

Dankie, hemelse Vader, vir die seisoene van die lewe wat mekaar opvolg en waaruit ons altyd iets vir die toekoms kan neem. Amen.

Lisel Joubert