Home » Januarie » Insig

Insig

Hy het my ʼn nuwe lied in die mond gelê, ʼn loflied vir ons God. Baie sal daarvan hoor en Hom die eer toebring, hulle sal op die Here vertrou! (Psalm 40:4).

Epifanie is die tyd waarin ons verskyning en lig vier. God het immers tussen ons kom woon. Hy het aan ons verskyn. Nie in ʼn droom nie, maar in die vlees. Ons weet nou hoe God is, want Jesus is God.

Lig het baie betekenisse. Ons sê iemand wat skielik iets verstaan, het “die lig gesien”. In strokiesprentboeke verskyn ʼn gloeilampie bokant ʼn karakter se kop wanneer hy of sy ʼn blink idee kry. Ons sê iemand met “insig” kan diep kyk.

God is met ons elkeen op reis en ons almal se paadjies lyk verskillend. Dit help nie ons vergelyk ons pad met ander sʼn nie. Miskien is geloofsgroei dan momente van insig in die Lig, wanneer ons die Lig sien of beter verstaan. Die Lig wat ons verlig en ons skuld en dwaasheid en blindheid laat wegsmelt en ons laat sing.

Psalm 40 sê God lê ʼn nuwe lied in ons mond – ʼn loflied. Dan kan ons vrede maak met die donker. Wanneer mense ikone skilder, verf hulle altyd van lig na donker. Die donker is die swanger verwagting van die lig wat sal deurbreek. En die lig sal áltyd deurbreek, want eintlik is die donker net lig wat ons nog nie raaksien nie.

Ek vier vandag die verskyning van die Lig uit Lig wat in my lewe verskyn het. En ek sê vir U dankie, Here. Amen.

Lisel Joubert