Home » Mei » Gesnoei tot beter mense

Gesnoei tot beter mense

Elke loot aan My wat nie vrugte dra nie, sny Hy af; maar elkeen wat vrugte dra, snoei Hy reg, sodat dit nog meer vrugte kan dra. Julle is alreeds reg gesnoei deur die woorde wat Ek vir julle gesê het (Johannes 15:2-3).

As ʼn boorling van die Karoo met min kennis van wingerde was die aanskoue van die snoeiproses aanvanklik vir my ʼn verrassing, indien nie ʼn skok nie.

Al die mooi lote wat so vrylik, amper roekeloos, afgeknip en dan op ʼn hoop gegooi word – is dit nie ʼn onnodige ingryping en vermorsing nie?

Later moes ek leer dat daar ʼn goeie rede voor is – om al hoe meer en beter vrug te waarborg. Selfs belangriker nog, dit is só beplan deur ʼn fyn en bedrewe hand wat ook die proses bestuur het.

Wat ʼn beeld om die lewe saam met en in Christus te beskryf! God kan aan ons lewe snoei, sodat ons lewe vryer en vrugbaarder sal wees.

Wat beteken God kan alles wat egte groei en lewe strem of belemmer, ja, alles wat ons meer selfsugtig, opgeblase en bekrompe kan maak, op ʼn dag begin ontmasker, afsny, wegsny, opruim en selfs laat sterf. Hetsy deur sy woord, die raad en vermaning van ander mense of selfs allerlei onverwagte terugslae en teleurstellings.

So ʼn snoeiproses gaan gewoonlik met groot pyn en ontnugtering gepaard, selfs met bittere lyding. Tog, wie bereid is om daaruit te leer, wie weet en glo dat hulle lewe steeds in die goeie en bedrewe hande van God is, kan óók weet dat alles uiteindelik ten goede sal saamwerk.

En dat hulle as beter en bruikbaarder mense anderkant sal uitkom.

Here, wat ʼn troos dat ons lewe in u hande is. Dat selfs wanneer ons swaarkry en ly, ons kan weet dat dit deel van u snoeiwerk aan ons lewe kan wees. En dat alles uiteindelik ten goede sal saamwerk. Amen.

Carel Anthonissen