Home » Junie » Oneindige dwaasheid

Oneindige dwaasheid

Vermy ʼn dwase mens; jy sal nie by hom leer om verstandig te praat nie (Spreuke 14:7).

ʼn Dwaas gebruik nie sy verstand nie en bring die dood oor homself (Spreuke 10:23).

Die slim en beroemde Albert Einstein het, naas sy wetenskaplike prestasies, ook baie lewenswyshede kwyt geraak.

Een hiervan is dat daar twee dinge is wat as oneindig voorkom.

Die eerste is die uitdyende heelal waarvan ons deel is. Die tweede is die dwaasheid van die mensdom. Veral laasgenoemde uitspraak verraai nie net ʼn skerp insig in die aard en psige van die mens nie; dit staaf ook wat ons amper daagliks rondom ons sien.

Dit is dat die mens traag bly om uit die foute van die verlede te leer.

Op die een of ander onverklaarbare manier bly mense blind vir hulle misstappe en herhaal hulle wat vir ander klinkklaar en onbetwisbaar dwaas en kortsigtig lyk.

Wat dít betref, het iemand Einstein se waarneming selfs ʼn stappie verder gevoer. Dié persoon stel dit soos volg: “What is much more widespread than actual stupidity, is playing stupid, turning off your ear, not listening, not seeing.”

Wat hiér bykom, is nie net blinde onkunde nie – dit is ook oneerlikheid, hardkoppigheid en misplaatse trots.

Mag die Here die maghebbers van ons tyd, en vir ons wat hulle bewonder en dikwels klakkeloos navolg, bewaar van hierdie doelbewuste en blatante vorm van dwaasheid.

Want dit is veel erger, en baie gevaarliker, as blote domheid.

O Here, bewaar ons vandag van daardie dwaasheid wat die kiem van dood in hom omdra. Amen.

Carel Anthonissen