Home » Julie » Reëls vir die winter

Reëls vir die winter

“Luister hierna, Job, staan stil en dink na oor die wonderdade van God” (Job 37:14).

Nie almal het die voorreg om in die wintertyd af te skakel, die kantoordeur agter hulle toe te sluit en weg te gaan nie.

Tog sit daar in hierdie oorgang van die seisoene, wanneer die meeste plante hulle blare afgooi, baie mense met vakansie gaan en die koue ons na binne dryf, die roep om stadiger te leef. Om hierdie tyd te gebruik om dieper te ontspan. En so iets van ons beter, geduldiger en liefdevoller self te herwin.

Om op dié manier ook nader te kom aan ons omgewing, ons medemens en miskien die belangrikste, die goeie Skepper van alles. Dit is dié God wat aan ons dié besonderse seisoen en luukse gun om ons in te keer – ja, ons selfs nuut te bekeer – tot dit wat regtig saak maak.

Die afgelope week stuur my skoonsus my ʼn klompie reëls wat my – en vir jou – in hierdie opsig kan help. Dié reëls staan bekend as binnehofreëls, of sommer stoepreëls. Dit lui soos volg:

“Read a book, feel the breeze, sip a drink, listen to the birds, enjoy the seasons, take a nap, put your feet up, relax!”

Jy moet tog saamstem. Dit kan nie te moeilik wees om hierby te hou nie.

Here, leer my in hierdie winterseisoen om, soos Job van ouds, stil te word en opnuut oor u wonderwerke na te dink. Amen.

Carel Anthonissen