Home » Februarie » Die Vader weet

Die Vader weet

“Julle Vader weet wat julle nodig het, nog voordat julle dit van Hom vra” (Matt 6:8).

In die ou dae het ʼn skip een stormagtige nag langs ʼn onherbergsame kusstrook op die rotse geloop. Al die passasiers en bemanning het verdrink. Al die slagoffers se familie is in kennis gestel. Die lyke wat uitgespoel het, is een vir een deur geliefdes opgeëis om in hulle tuisdorpe begrawe te word.

Almal behalwe dié van ʼn babadogtertjie. Niemand het haar liggaampie kom haal nie. Niemand het geweet wie haar ouers was, hoe oud sy was of wat haar adres was nie. Die passasierslys het nie haar naam bevat nie. Ná ʼn paar dae is die dogtertjie op ʼn plek naby die ramptoneel begrawe. Op haar grafsteen was net drie woorde: Die Vader weet …

Ja, die Vader het haar geken en Hy het geweet by wie sy hoort.

Jesus het eenmaal gesê: “Julle Vader weet wat julle nodig het, nog voordat julle dit van Hom vra” (Matt 6:8). Hy weet alles van ons lewe af. Ons is immers sy kinders. Hy weet wie ons is, wat ons adres en werkplek is, wie ons ouers, kinders en vriende is.

Hy weet veral wat ons behoeftes is. Hy sien ons nood raak. Hy ken ons lyding. Hy verstaan ons.

Weet dus: Die Vader wéét!

Die Vader weet wat ons behoeftes is. Hy sien ons nood raak. Hy ken ons lyding. Hy verstaan ons.

Vader, U ken my. U ken ook al my sonde. En tog weet ek dat U my nogtans liefhet! U jaag my nooit weg nie. Dankie dat U my aanvaar soos ek is. Amen.

Johan Cilliers