Home » September » Inskiklikheid

Inskiklikheid

Wees inskiklik teenoor alle mense (Fil 4:5).

Die tweede riglyn wat Paulus vir ons gee oor die styl van ons Christelike hoop, is dat ons inskiklik sal wees teenoor alle mense (Fil 4:5). Dié eienskap kan ook vertaal word met vriendelikheid (sien die 1953-vertaling).

Die Griekse woord wat Paulus hier gebruik, dui letterlik op ’n sagtheid van hart, op ’n hart wat maklik vermurf, op gebrokenheid voor die Here. Dit verwys na die lewensingesteldheid van iemand wat weet dat hy of sy alleen uit die genade van die Here kan leef, en wat daarom ook ander mense uit hierdie genade wil laat leef. Dit verwys na mense wat die nabyheid van die Here só gesmaak het dat hulle ander dit ook gun.

Inskiklike mense leef oop en bloot voor die Here, is afhanklik van en sensitief vir sy nabyheid. Hulle voete kom met vriendelikheid in beweging na die wêreld toe, na alle mense toe, sonder onderskeid.

Dit is hoe dit moet wees! Die wederkoms moet ons nie met vrees vul nie, maar met vriendelikheid; dit moet ons nie laat wegkruip nie, maar laat uitkruip uit ons kokonne, ons laat uitreik na alle mense, met vriendelikheid.

Martin Luther het gesê die styl van ons hoop lyk by uitstek só: om bly te wees voor die aangesig van God en vriendelik voor die mense. Dink daaraan: As jy vandag bly en vriendelik is, is dit ’n teken dat jy die Here verwag!

Wees bly voor die aangesig van God en vriendelik voor die mense.

Here Jesus, bevry my uit my kokon sodat ek kan uitfladder na ander mense wat in hulle kokonne wegkruip vir die lig, wegkruip vir U. Maak my voete vlug met vriendelikheid, haastig om van die vriendelike God te vertel. Amen.

Johan Cilliers