Hoe anders sal ons leer?

Lees Psalm 141:6-10.

Laat die goddeloses gevang word in hulle eie nette, maar laat my ongedeerd verbykom (v 10).

Here, dit is my opregte gebed dat u doel bereik
sal word deur die mense wat U gestuur het
om ons die leviete voor te lees.
Hoe anders sal ons leer?

Hoe anders sal ons weet
dat U steeds met ons gesprek voer,
selfs bo die moeilikheidmakers se geskreeu?
Dat dié bose geharwar iewers sinvol is?

In ’n tyd dat goddeloosheid so half ’n spitspunt bereik
en u kinders se uithouvermoë tot die uiterste beproef word,
is U ons enigste hoop.
Ons is stil geskrik vanweë die kragdadigheid van die kwaad.
Ons menswees lê die wêreld vol gestrooi:
die flentertjies lewe wat oorgebly het
nadat boosheid met ons afgereken het.

Dit is net U wat ons weer bymekaar kan maak;
wat ons kan vergewe, en vergeet dat U vir ons kwaad was.
Wat sal onthou dat ons steeds u eiendom is
en dat ons ál ons hoop vestig op ’n nuwe begin in u Naam.

O Here, sien tog toe dat U en u gesante se werk aan ons
toe nie tevergeefs was nie! Dat ons ons nou aktief wegkeer
van die bose; dat ons die goddeloosheid teenstaan
en ons volledig op U verlaat.

U sal agterkom dat ons oë op U gerig bly,
ja, dat ons bly kyk na die hand wat ons bewaar.
Die een wat in ’n vuis teen die vyand bal,
maar sag, verwelkomend, vir ons oopmaak.

U betrap hulle onverhoeds.
Hulle val voordat hulle dit besef.
En ons … óns het ons les geleer:
Ons onthou die God van ouds maar te goed.
En Hy, dié Goedheid, vergeet óns nooit.
Amen.

Barend Vos


Word ’n Bybel-Boodskapper

Ondersteun Boodskap-Vir-Vandag

Help ons om gelowiges wêreldwyd digitaal met die boodskap van Jesus te bemoedig. Deur jou vrygewigheid sal jy hierdie daaglikse aanlyn inspirasie in mense se lewe moontlik maak.

KLIK HIER vir meer inligting oor hoe net R2 per dag 'n reuse-impak kan maak.

Hier is ’n getuienis oor wat Boodskap-Vir-Vandag vir mense beteken.

Ken wil dieper oor sy geloof nadink, en hy het vir ons hierdie e-pos gestuur: