Hoe doen ek dit prakties?

Hierdie mense sing ’n nuwe lied daar voor die troon en voor die vier lewende wesens en die ouderlinge. Niemand anders as net hierdie honderd vier en veertig duisend mense, wat van die aarde af losgekoop is, kon hierdie lied leer nie. Dit is hulle wat hulle nie met vrouens besoedel het nie; hulle het kuis gebly. Hulle volg die Lam waar Hy ook al gaan. Hulle is onder die mense uit losgekoop as eerstelinge vir God en vir die Lam. Uit hulle mond het daar nooit ’n leuen gekom nie. Hulle is onberispelik (Openbaring 14:3-5).

Die vraag wat altyd oor evangelisasie gevra word, is: “Hoe doen ek dit prakties?” As mense lewelose items op ’n vervoerband was, was die antwoord hierop maklik. Of as mense bestanddele in ’n resep was, kon ons gou ’n geestelike handleiding nadertrek. Maar mense is nie items of bestanddele nie. Daarom is daar geen kitsantwoorde op hierdie vraag nie.

Om ’n sendeling te wees is om ’n gestuurde te wees sonder dat jy die besonderhede van die pad vorentoe ken en sonder om presies te weet wat om te doen. Sendeling-wees is ’n leefwyse. Elke dag meld jy aan vir jou lewe saam met Jesus. Jy vertrou Hom blindelings om die regte deure oop te maak waar jy sout moet strooi en lig moet wees. Jy volg die Lam waar Hy ook al gaan, soos Openbaring 14 sê.

Jesus sal jou doodgewone woorde en jou geringe dade seën sonder dat jy noodwendig die vrug of reaksie daarop sien. Hy sal sorg vir die oeste op sy aardse landerye, as jy maar net getrou is. Vrugdra is nie vir ons om altyd te sien of te ervaar nie. Vrugdra is ’n diens wat ons tot eer van die Here en tot voordeel van ander lewer. Ander mense wat elke dag met ons te doen kry, sal weet of ons Jesus volg.

Sendeling-wees gebeur ook nie net wanneer God se familie feestelik saamkom nie, maar veral wanneer ons voltyds ontplooi word oorkant die pad. Mense wat hulle geloof uitleef, dink nie meer in terme van voltydse of deeltydse bedienings of aan vrywilligers wat na-ure by ’n plaaslike gemeente werk nie. Hierdie kategorieë bestaan nie vir hulle nie. Hulle leef voltyds vir Christus en is sonder ophou in sy diens, of hulle nou by die werk, by die kerk of oorkant die pad is.

En hulle rolmodel is die barmhartige Samaritaan wat sy reisplanne onderbreek het om tot stilstand te kom langs ’n vreemdeling in nood.

Here Jesus, Lam van God, help my om U na te volg soos Openbaring 14 beskryf. Ek wil elke dag met my hele lewe aanmeld vir diens. Al sien ek nie die vrug daarvan nie, is dit vir my genoeg om saam met U te loop. Amen.