Dag 51: God vergeet; hoekom onthou jy?

Solank jy onder die lewendes is, het jy hoop. ’n Hond wat lewe, is beter as ’n leeu wat dood is (Pred 9:4).

Jy skuld jouself vandag. Soos Prediker 9 sê, ’n lewende hond is beter as ’n dooie leeu. Nou ja, jy ook. Jy leef! Jy is hier. Al het jy dalk jou werk verloor of ernstig siek geword, God het gekies dat jy vandag steeds leef.

Jou waarde het nie skielik afgeneem omdat die geld in jou sak verdwyn of jou gesondheid dramaties verander het nie. Of omdat ’n maatskappy jou dienste te beëindig of jou huwelik of ’n kosbare vriendskap op die rotse geloop het nie. Jy is nie vandag ’n mislukking omdat hierdie dinge gebeur het nie. Nie eens al die verkeerde dinge wat jy gedoen of die skewe paadjies wat jy gister gekies het, kan vandag teen jou tel as jy in die Here se hand leef en sy vergifnis ken nie.

Jy leef vanuit die genade van God. Jy is kosbaar in God se oë. Gister se foute en gebreke is minstens ’n nagreis ver agter jou. Saam met gister wat verby is, is gister se seer, swaar, verkeerde besluite, struikeling en pyn ook verby. God het gekies om oor en voor met jou te begin. Hoekom dan weier om sy genade te ontvang? Hoekom weier dat God jou opnuut met sy liefde en deernis omvou? Hoekom vasklou aan bitterheid of selfbejammering?

Moenie die leuens glo dat jou waarde net in geldterme gemeet kan word nie, of dalk net aan die nut wat jy vir ander het nie. Jy is so kosbaar dat God jou nie oorgeslaan het toe Hy vanoggend aan al sy geliefdes hier op aarde brood uitgedeel het nie. Ook is jy nie afgeskeep toe nog ’n porsie nuwe lewe deur die Gees oor sy kerk uitgegiet is nie. God het besluit om jou flou gister te vergeet; hoekom hou jy dit dan nog lewend? Moenie toelaat dat vals verhale oor gister en eergister jou gevange hou nie. Ontsnap uit jou selfopgelegde vonnis. Raak vry. Leef vandag!

Dankie, Here, dat U vandag as geskenk aan my gegee het. Help my om gister se mislukkings, seer en spyt aan u voete neer te sit sodat ek nou, vandag, vry kan leef. Amen.

Posted in Mei

Dag 50: Moenie ’n slagoffer wees nie

Die Here sal voor jou uit gaan. Hy sal by jou wees. Hy sal jou nie in die steek laat nie, jou nie alleen laat nie. Moenie bang wees nie, moenie skrik nie” (Deut 31:8).

Jy is nie ’n slagoffer nie. Jy is iemand wat elke dag ’n lewensgrootte verskil kan maak. Hierdie verskil gebeur as jy kies om nie ’n gevangene van jou emosies, omstandighede, verlede, familie, kerk, werk, buurt, land of wat-ook-al te wees nie. Ja, jy het ’n verlede, of jy dit nou wil weet of nie, en jou verlede gooi elke dag ’n skaduwee, of ’n lig, oor vandag. Jy kan ongelukkig nie maak asof gister of eergister nie ’n uitwerking op jou manier van leef het nie, want dit het. Maar jy kan wel besluit of dit ’n skaduwee of ’n lig sal wees.

Wanneer onwelkome gebeure soos misdaad, mishandeling of ander traumatiese ervarings littekens op ons lewe laat, kan ons maklik in slagoffers van die lewe verander. Dan bly ons in die intensiewe eenheid as ons nie iets daadwerklik hieraan doen nie. Vra my, ek was ook al die slagoffer van ’n motorkaping.

Aanvanklik het ek gedink ek cope goed met hierdie traumatiese ervaring, totdat my vrou en goeie vriende my oortuig het dat ek die situasie nie doeltreffend hanteer nie. Eers toe ek by ’n terapeut uitgekom het, het die greep wat hierdie insident op my daaglikse menswees gehad het van my skouers afgegly. Ek moes kies om nie langer gevange gehou te word deur emosies soos vrees, woede of selfs haat nie. Ek moes kies om oor te begin leef. Ek moes besluit dat ’n nuwe dag vir my aangebreek het. En dit het! Goddank!

Watter dinge hou jou gevange sodat jy die mooiheid van vandag nie ten volle kan geniet nie? Watter vrese en onsekerhede lê jou lam? Kyk dit in die oë. As dit moet, gaan praat met iemand wat jou kan help om vry te kom hiervan. Jy is nie ’n supermens nie. Jy is nie onbreekbaar en onaantasbaar nie. Die lewe gebeur, ook met jou.

My God en veilige Vesting, ek lê my vrese by u voete neer. Gee vir my u vrede sodat ek nie die mooie wat U vandag aan my wil skenk, misloop as gevolg van die verlede wat by my spook of weens my bekommernisse oor die toekoms nie. Amen.

Posted in Mei

Dag 49: Slaap elke nag in die Here se arms

As julle kwaad word, moenie sondig nie, en moenie ’n dag kwaad afsluit nie (Ef 4:26).

Ons moet elke dag voluit leef, maar ons moet elke dag ook voluit rus. Ons is nie werkslawe nie, beslis ook nie leef-slawe nie. Net soos ons manier van leef, moet ons manier van slaap ook ’n getuienis wees van ons lewe wat elke dag in die Here se hand is.

Die lewe gebeur nie net wanneer ons wakker is nie, maar ook in ons slaap. Dan is ons nie skielik vir ’n paar uur uit aksie of afwesig nie. Ons moet seker maak dat ons elke aand gelowig, in God se arms, gaan slaap. Daar rus ons regtig. Daar is ons veilig. As ons elke aand eers ons probleme aan die Here voete neersit en in ruil daarvoor sy rus ontvang, slaap ons goed. Dan kry ons nuwe krag om bedags oop-oë deur ons drome te leef.

Sluit elke dag behoorlik af voordat jy gaan slaap. Wees bly dat vandag ook God se spesiale geskenk aan jou was. Sluit dit dankbaar af sonder dat jy dink jy het outomaties enige reg op môre. Moenie los drade aan die einde van vandag laat rondlê nie.

Moet ook nooit met woede gaan slaap nie. So sê Paulus in Efesiërs 4. Woede mag nooit in jou siel agterbly as die son aan die einde van die dag oor jou sak nie. Praat dit uit as dit moet. Verwyder dit uit jou gedagtes.

Wees vry wanneer jy jou oë toemaak. En wees bly oor elke vandag wat die Here aan jou gee. Dis genade, verniet, onverdiend. Hier aan die einde van nog ’n genade-dag skenk die Here jou ’n heerlike nagrus.

Dankie, Here, vir die geskenk van rus. Help my om al my woede, frustrasie en angs elke aand by u voete neer te lê sodat ek elke oggend verfris sal voel en die nuwe dag met oop hande as ’n geskenk van U kan ontvang. Amen.

Posted in Mei

Dag 48: Carpe Diem, selfs die chaos daarvan

In die begin het God die hemel en die aarde geskape. En die aarde was woes en leeg, en duisternis was op die wêreldvloed, en die Gees van God het gesweef op die waters. En God het gesê: Laat daar lig wees! En daar was lig (Gen 14:1-3).

In rugby is daar ’n bekende “use it or lose it”-reël. Dit geld ook vir ons intelligensie. So sê die neurowetenskaplikes. As jy ophou om sekere breinfunksies te benut, kan jy later sommige van daardie vermoëns verloor. Geestelike intelligensie werk ook so – gebruik dit of verloor dit.

Oefen daarom elke dag om een dag op ’n slag vir God te leef. Begin vandag. Dit gaan die res van die dag so anders maak. En môre ook, as God wil dat jy nog in daardie tydsone leef. Maar hier en nou moet jy die regte keuses maak sodat daar vir die mense naby aan jou ’n pad gebou word waarop hulle ook kan loop, ’n pad wat hulle duidelik kan sien. Los jou voetspore agter dié van die Rots, Jesus. Dan is daar vir ander ’n goeie lewenspad gebaan. Jy is dit aan hulle verskuldig.

Leef elke dag in die lig van God se prioriteite. Beplan sodat jy nie mislukking ’n metgesel op jou pad maak nie. Moenie onverskillig leef nie. Maar moet ook nie bang wees vir onsekerheid en chaos nie. Anders as al die mense wat toekomsgeoriënteerd leef, vir wie chaos so bedreigend is omdat dit die ordelikheid en roetine van die lewe omverwerp, moet jy juis floreer in chaos.

Hoekom? Want jy weet Jesus het gekom om Lig in donker te bring. Die Hebreeuse woord wat ons met “woes” vertaal, kan ook met “chaos” vertaal word. Chaos is God se gunsteling-werkterrein, nie veilige hawens nie. Daarom bedreig dit jou nie wanneer jy chaos rondom jou sien nie. Dis jou werkplek! Nou toe, gaan koop die tyd vandag behoorlik uit, uur vir uur!

Skepper-God, help my om in chaos en onsekerheid aan U vas te hou en dit as ’n geleentheid te sien waarin U my kan gebruik om lig in die donker te bring. Amen.

Posted in Mei

Dag 47: Buite-die-boot-geloof

Kom!” sê Hy. Petrus het uit die skuit geklim, op die water begin loop en naby Jesus gekom. Maar toe Petrus sien hoe sterk is die wind, het hy bang geword en begin sink en uitgeroep: “Here, red my!” Dadelik het Jesus sy hand uitgesteek, hom gegryp en vir hom gesê: “Kleingelowige, waarom het jy begin twyfel?” (Matt 14:29-31).

Hoeveel maal word geestelik intelligente mense wat drome droom en vergesigte sien se entoesiasme en visie deur pessimiste rondom hulle gesteel! Moenie jou ore aan hierdie pessimisme uitleen nie. As Moses na al die doemprofete op pad na die Beloofde Land geluister het, sou die Israeliete in die woestynsand weggesyfer het. Martin Luther sou nooit teen die kerk van sy dag opgestaan en die Reformasie aan die gang gesit het nie. Moeder Teresa sou nooit vrou-alleen by Kolkata ingestap het om die armes se lot ingrypend te verander nie. En jy? Luister jy na die pessimiste, of na die Gees se roepstem in jou hart?

Ons is soms oorversigtig uit vrees vir foute maak, maar om foute te maak is menslik en boonop kan ons daaruit leer. Hierdie vrees moet ons nie lamlê nie. Oorversigtigheid was die aanvaarde wysheid toe alles in die samelewing relatief staties was. Vandag se wêreld is blitsvinnig. Ons het gelowiges nodig soos dié wat Malcolm Gladwell in sy boek Blink beskryf, gelowiges wat oombliklik en intuïtief die regte geestelike besluite kan neem en kreatief op hulle voete kan dink; passievolle God-dieners met leeuemoed wat nie bang is om die status quo omver te werp nie. Radikaal? Ja, maar die alternatief is veel erger: stagnasie en dood!

Jesusvolgelinge skrik nie vir uitdagings nie, al bewe hulle. Hulle leef in die geloof dat God hulle soms uitdaag om uit die boot te klim en saam met Jesus op die water te wandel. As hulle sink, weet hulle ten minste dat Jesus daar sal wees om hulle te red. Maar hulle kan nie nee sê vir die kans van ’n leeftyd om saam met Jesus op die water te stap bloot omdat hulle bang is om vandag se geestelike uitdagings in die oë te kyk nie. Hulle is doeners. Hulle vingerafdrukke is op elke dag te sien, vingerafdrukke met die kruis van Christus daarop ingegraveer.

Jesus, help my om uit die boot, my gemaksone, te klim. Ek wil graag ’n passievolle lewe saam met U op die water leef. Maak my ’n doener wat na u stem luister, eerder as na die pessimiste daar buite. Amen.

Posted in Mei

Dag 46: Die lewe op arendsvlerke

Maar dié wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie (Jes 40:31).

Geestelik intelligente mense het altyd oorgenoeg tyd, ’n volle dag op ’n slag. Daarom kan hulle leef, werk en rus. Hulle is nie soos dié mense wat gedurig te min tyd het nie en hulle spog nie oor wie die besigste is nie. Hulle kry nie maagkrampe en spanningshoofpyne oor alles wat nog gedoen moet word nie. Hulle het daagliks die regte lewensritme.

Mense met God se tyd in hulle harte weet hoe om pas te hou. God gee immers hulle lewenspas aan.

Dit wat vir God saak maak, tel die meeste punte in hierdie mense se dagboek. Daarom laat hulle nie ’n enkele dag die son sak voordat hulle tasbaar omgegee het vir minstens een van God se gunstelingmense nie. Hulle skep geleenthede om iets vir onbelangrike mense te beteken, vir ’n arme, ’n verstoteling, ’n sieke. Dit maak hulle nie moeg, gespanne of gejaagd nie, want mense wat vanuit hulle passie leef, loop sonder om afgemat te raak. Hulle leef voluit, want die Here gee vir hulle krag. Hulle wil diensknegte wees vir net een persoon langs hulle. Dis meer as genoeg. Een dag op ’n slag, een mens op ’n keer – dis hulle leefritme. Om ander mense se lewe te verander is die Here se afdeling. Maar hulle wil graag daar wees waar die Here deur hulle sy veranderingswerk doen.

Peter Drucker vra ’n goeie vraag: “What can I and only I do that, if done well, will make a real difference?” Gebruik hierdie vraag as ’n leefriglyn, want dit sal bepaal of jy elke dag op die doeltreffendste manier tot God se eer gebruik. Staan elke dag jou tyd en energie af aan al die goeie dinge waarvoor die Here jou bestem het, soos Paulus in Efesiërs 2:10 sê.

Here, dankie dat U my elke dag met 24 uur seën. Wees U my pasaangeër sodat ek in pas met U kan leef, op arendsvlerke kan sweef sonder om moeg te word. Amen.

Posted in Mei

Dag 45: Trek jou feesklere aan

Eet dus jou brood met vreugde, drink jou wyn met ’n bly gemoed; God het lankal reeds goedgekeur wat jy doen. Dra altyd wit klere, versorg jou hare met olie (Pred 9:7-8).

Gelowiges weet dat God vol vreugde is. Saam met die psalmdigter verheug hulle hulle oor elke nuwe dag wat die Here gemaak het. Hulle is daaglikse vreugdeskeppers en -uitdelers. Hulle wag nie vir ’n amptelike vakansiedag op ’n kalender voordat hulle begin feesvier nie. Hulle skep en beleef elke dag hulle eie lewensfeeste.

In Prediker 9 lees ons ons moet elke dag wit klere dra en ons hare met olie versorg. Mense in die Bybelse tyd was baie arm. Hulle het meestal net een of twee stelle gewone klere gehad en ’n ekstra stel wit klere wat hulle feesdrag was. Wanneer mense hulle feesklere aangehad het, het almal geweet ’n buitengewone geleentheid vind iewers plaas.

Die Prediker se raad is dat mense nie net op feesdae wit klere moet dra nie, maar elke dag. Ons moenie vir ander wag om ’n fees te laat aanbreek nie; ons moet dit self laat gebeur. Ons klere moet dit wys. Ons leefstyl ook.

So ook die feit dat ons olie op ons hare uitgiet. In die Bybelse tyd het mense gewoonlik ’n bietjie duur olie op hulle gaste se koppe uitgegooi wanneer hulle vir ’n feesmaal opgedaag het. Die Prediker sê ons moet dit ook gereeld vir onsself doen. Ander moet die feesvreugde gedurig aan ons kan ruik.

Jesus se volgelinge kies doelbewus om vandag met vreugde te vul, al is vandag nie noodwendig lekker nie. Die Here se mense kies vir feesklere en vir lekkerruikolie. Hulle kies, soos Paulus, om lofliedere in die tronk te sing. Hulle leefpassie is oorweldigend. Hulle straal in elke situasie hoop, krag en lewe uit.

Here, dankie vir alles waarmee U my vandag seën. Help my om elke dag my vreugde in U te vind en om daarmee selfs meer aansteeklik te wees as enige virus, sodat die hele wêreld soos Paulus lofliedere sal sing, selfs al voel ons ons is in die tronk.

Posted in Mei

Dag 44: Kan die wederkoms se datum verander?

Die Here stel nie die vervulling van sy belofte uit nie, al dink party mense so. Nee, Hy is geduldig met julle, omdat Hy nie wil hê dat iemand verlore gaan nie: Hy wil hê dat almal hulle moet bekeer (2 Pet 3:9).

Is jou sitplekgordel vas? Hier volg “skokkende” nuus: So belangrik is die “verkeerde mense” in God se oë dat Hy selfs bereid is om die wederkoms se datum te verskuif om hulle te red. Ja, jy het reg gelees. Of dink jy Petrus maak grappies as hy presies dit in 2 Petrus 3 sê? Natuurlik nie! Petrus sê hier vir die spotters, wat lag vir die Christene omdat die wederkoms nog nie aangebreek het nie, dat God juis om húlle onthalwe wag met hierdie groot dag.

God het niemand vir die hel geskep nie. Daarom talm Hy om vir oulaas terug te keer as Regter, want Hy wil hê sy hemelse feessaal moet nog voller en die doderyk nog leër word. Praat van mensgeoriënteerde tydsbestuur! God stel nie die wederkoms af nie, net uit. Hy wag nog ’n rukkie langer, want sy gunstelingmense, verlorenes, is nog nie tuis by Hom waar hulle hoort nie.

Aan die ander kant sê God in 2 Petrus 3:11-12, ewe verrassend, dat ons die wederkoms kan verhaas. Die Griekse woord wat Petrus hier gebruik, beteken letterlik om die wederkoms vinniger nader te bring. Gelowiges wat die goeie nuus elke dag deur hulle dade en woorde uitdra, maak ’n lewende verskil.

God sal op presies die regte tydstip as Regter en Redder opdaag. Hy sal glad nie laat wees vir sy finale afspraak met die wêreld nie. Ons hoef egter nie ons koppe te breek oor die presiese dag nie. God werk nie met ’n abstrakte terugkeerdatum nie. God is sedert die skepping en Jesus se herskepping dinamies, dag vir dag, met mense onderweg na sy groot dag. Mense is die hemelse horlosie!

Here ons Redder, dankie dat u tydsbestuur so mensgerig en geduldig is, ook wat die wederkoms betref. Gebruik my in u reddende werk op aarde. Amen.

Posted in Mei

Dag 43: Verkeerde mense

Die tollenaars en sondaars het almal die gewoonte gehad om na Jesus te kom luister. Hierteen het die Fariseërs en die skrifgeleerdes beswaar gemaak … Toe vertel Jesus vir hulle hierdie gelykenis: “Sê nou een van julle het honderd skape en een van hulle raak weg. Wat doen hy dan? Hy laat die nege en negentig in die veld staan en gaan agter die een aan wat weg is, totdat hy hom kry … Ek sê vir julle: Net so sal daar ook in die hemel blydskap wees oor een sondaar wat hom bekeer, eerder as oor nege en negentig mense wat reg doen en nie bekering nodig het nie” (Luk 15:1-7).

God hou veral van sondaars, goddeloses, dooies en magteloses (Rom 5). Al wat godsdienstiges vir sondaars kan doen, is om hulle op die ou end met klippe dood te gooi. Maar om vir die verkeerde mense om te gee, dié vir wie Jesus sy lewe kom aflê het, dít is ’n heeltemal ander storie. Jesus bring die meeste van sy tyd deur op die oop see waar sondestorms woed. Hy het die name en adresse van al die drenkelinge, én die reddingstoue om hulle te red. Dit is sy passie, sy gunstelingwerk. Jesus se lewe draai om verlore skape, verlore munte, verlore kinders – hiervoor laat staan God net mooi alles.

In die hemelse daaglikse beplanning is daar net een vraag op die almagtige God se tafel: “Sal mense vandag hierdeur op die regte maniere aangeraak en verander word?”

Ek wonder hoeveel van die godsdienstige aktiwiteite waarmee ons ons besig hou, word deur hierdie vraag bepaal. Daar is soveel ander “prioriteite” op ons agendas. Geestelik intelligente mense belyn egter hulle prioriteite met dié van die hemel. Hulle diepste vraag (veral met dagbeplanning) is ook: “Sal mense se lewe tot eer van God hierdeur aangeraak en verander word?”

As ons oor die nodige geestelike intelligensie beskik, stel ons ons dagprogram én ons afsprake volgens God se manier van tydsbestuur op. Dan verskuif die klem in ons lewe drasties vanaf geld, persoonlike sukses en voorspoed na God se gunstelingmense. Dalk vra dit dat ons vandag sal bedank uit ’n paar komitees wat lankal van God se agenda vergeet het, sodat ons God se stukkende mense kan begin dien en hulle veilig kan oortel tot in sy wingerd.

Here, leer my om my dagboek volgens u prioriteite en tydsbestuur in te rig. Gee vir my u hart vir die “verkeerde” mense en die bewussyn dat ek een van hulle is. Amen. 

Posted in Mei

Dag 42: Geestelike intelligensie

Die Woord het mens geword en onder ons kom woon. Ons het sy heerlikheid gesien, die heerlikheid wat Hy as die enigste Seun van die Vader het, vol genade en waarheid (Joh 1:14).

Sommige gelowiges worstel met ’n gebrek aan geestelike intelligensie. Sommige van die Here se skape het slagtande. Eina! Waag jy dit om iets te sê wat hulle gemaksones versteur, word jou karakter én geloof met swart kryt bekrap.

Johannes 1:14 sê vir ons Jesus is vol genade en waarheid – egte geestelike intelligensie in ’n neutedop! Genade is om vir die verkeerde mense om te gee – stukkende mense, maar ook vir dié van wie jy nie hou nie of met wie jy nie oor die weg kom nie. Geestelik intelligente mense is nie softies met ’n askies-dat-ek-leef-houding nie. Nee, hulle staan op en uit vir die waarheid. En dié waarheid is ’n Iemand, Jesus Christus! Hulle staan en val by die belydenis dat Jesus die Here van hulle lewe is.

Geestelike intelligensie is genade én waarheid. Wanneer gelowiges slegs waarheid beklemtoon, raak hulle liefdeloos en onsimpatiek. Hulle woon dan in “Morele Hovaardigheid-straat”, daar waar dooie reëls veel meer tel as lewende verhoudings met God en ander mense. En wanneer gelowiges net genade beklemtoon, tel mense se gevoelens vir hulle meer as God se eer. Dié wat genade oorbeklemtoon, staan nie so maklik op vir die waarheid nie, want hulle wil niemand ooit aanstoot gee nie.

Geestelik intelligente mense tree liefdevol, maar ferm op. Hulle gaan nooit kompromieë aan nie, maar hulle trap ook nooit op ander nie. Soms bly hulle tjoepstil, al weet hulle dat hulle reg is. Hulle laat nooit hulle eie opinies tot elke prys geld nie. As hulle verkeerd is, sê hulle askies. En as daar gehelp moet word, meld hulle aan vir diens. Geestelik intelligente mense is sag, broos, standvastig, sterk, swak … Daarom dat ’n groot dosis geestelike intelligensie vandag so dringend nodig is in die kerk.

Here, bewaar my van morele hovaardigheid en vrees vir aanstoot gee. Help my om te groei in genade en waarheid sodat ek met geestelike intelligensie gebalanseerd sal leef. Amen.

Posted in Mei
1 2 3 4 152