Soos U die trom slaan

Lees Psalm 109:30-31.

Want Hy staan by die arme en red hom van dié wat hom ter dood wil veroordeel (v 31).

Here, dit is straks lasterlik om dit só te stel
– hoe anders as in mensetaal kan ons tog praat? –
maar ek kry soms die prentjie in my kop
van U as krygsman: regop, presies;
u hand paraat opgehef om almal
wat vir U lief en dierbaar is te verdedig.

U is mos die Beskermer,
die Here van die leërskare,
Wagter wakend op die mure,
die God van ons behoud.

U gee ’n bevel en kyk hoe almal skarrel;
u opdragte word nougeset gehoorsaam.
’n Blote woord van U is ’n swaard
met twee snykante; u waarheid die gordel
om baie heupe. Die geloof in U
is ’n skild wat bose brandpyle afweer.

Daarom sal ek U salueer waar ek ook al gaan.
Ek sal marsjeer soos U die trom slaan.
Ek klouter teen kranse van tou en draad op;
ek hardloop deur hindernisse, want U is aan my sy.
U stem is my aansporing; u gestrekte arm my hulp;
u beloftes genoeg beloning vir hierdie ontberings.

Ek sal nou, as U wil, almal op parade roep,
dan bulder: “Aan julle regterflank staan die Een
na wie julle julle moet oriënteer. Gaan staan in gelid!”

Ek vind vreugde en veiligheid by U, in watter sone
ek my ook al bevind. Waar ek gaan of staan of hardloop.
Daar waar ek op u bevel wegkruip, herbeplan,
of bloot op die plek rus.

Ek is ’n soldaat vir U,
my Krygsheer.
My aandag behoort aan U.
Amen.

Barend Vos


Word ’n Bybel-Boodskapper

Ondersteun Boodskap-Vir-Vandag

Help ons om gelowiges wêreldwyd digitaal met die boodskap van Jesus te bemoedig. Deur jou vrygewigheid sal jy hierdie daaglikse aanlyn inspirasie in mense se lewe moontlik maak.

KLIK HIER vir meer inligting oor hoe net R2 per dag 'n reuse-impak kan maak.

Hier is ’n getuienis oor wat Boodskap-Vir-Vandag vir mense beteken.

Ken wil dieper oor sy geloof nadink, en hy het vir ons hierdie e-pos gestuur: